सैनिक हो तुमच्यासाठी

भारतीय नागरिकाचा, घास रोज अडतो ओठी
सैनिक हो तुमच्यासाठी ॥ धृ ॥

वावरतो फिरतो आम्ही
नित्यकर्म अवघे करतो
राबतो अपुल्या क्षेत्री
चिमण्यांची पोटे भरतो
परि आठव येता तुमची आतडे तुटतसे पोटी
सैनिक हो तुमच्यासाठी ॥ १ ॥

आराम विसरतो आम्ही
आळसा मुळी ना थारा
उत्तरेकडून या इकडे
वार्तांसह येतो वारा
ऐकताच का अश्रुंची डोळ्यांत होतसे दाटी
सैनिक हो तुमच्यासाठी ॥ २ ॥

उगवला दिवस मावळतो
अंधार दाटतो रात्री
माऊली नीज फिरवीते
कर अपुले थकल्या गात्री
स्वप्नात येऊनी चिंता काळजा दुखविते देठी
सैनिक हो तुमच्यासाठी ॥ ३ ॥

रक्षिता तुम्ही स्वातंत्र्या
प्राणास घेउनी हाती
तुमच्यास्तव अमुची लक्ष्मी
तुमच्यास्तव शेती-भाती
एकट्या शिपायासाठी झुरतात अंतरे कोटी
सैनिक हो तुमच्यासाठी ॥ ४ ॥

- ग. दि. माडगुळकर