सर्वात्मका शिवसुंदरा

सर्वात्मका शिवसुंदरा, स्वीकार या अभिवादना
तिमिरातुनी तेजाकडे, प्रभू आमुच्या ने जीवना ॥ धृ ॥

सुमनात तू गगनात तू,
ता-यामध्ये फुलातोस तू,
सद्धर्म जे जगातामध्ये,
सर्वात त्या वसतोस तू,
चोहीकडे रुपे तुझी, जाणीव ही माझ्या मना
तिमिरातुनी तेजाकडे, प्रभू आमुच्या ने जीवना ॥ १ ॥

श्रमतोस तू शेतामध्ये,
तू राबसी श्रमिकांसवे,
जे रंजले वा गांजले,
पुसतोस त्यांची आसवे,
स्वार्थाविना सेवा जिथे, तिथे तुझे पद पावना
तिमिरातुनी तेजाकडे, प्रभू आमुच्या ने जीवना ॥ २ ॥

न्यायार्थ जे लढती रणी,
तलवार तू त्याच्या करी,
ध्येयार्थ जे तमि चालती,
तू दीप त्यांच्या अंतरी,
ज्ञानार्थ जे तपती मुनी, होतोस त्यांची साधना,
तिमिरातुनी तेजाकडे, प्रभू आमुच्या ने जीवना ॥ ३ ॥

करुणाकरा करुणा तुझी,
असता मला भय कोठले,
मार्गावरी पुढती सदा,
पाहीन मी तव पाऊले,
सुजनत्व या हृदयामध्ये नित जागवी भीती विना
तिमिरातुनी तेजाकडे, प्रभू आमुच्या ने जीवना ॥ ४ ॥

- कुसुमाग्रज