प्रिय अमुचा एक महाराष्ट्र देश हा

बहु असोत सुंदर संपन्न की महान
प्रिय अमुचा एक महाराष्ट्र देश हा ॥ धृ ॥

गगनभेदि गिरिविन अणु नच जिथे उणे
आकांक्षापुढति जिथे गगन ठेंगणे
अटकेवारी जेथील तुरंगि जल पिणे
तेथे अडे काय जलाशय न दाविणे?
पौरुषासि अटक गमे जेथ दू:सहा
प्रिय अमुचा एक महाराष्ट्र देश हा ॥ १ ॥

प्रासाद कशास जेथ हृदयमंदिरे
सद्भावांचीच भव्य दिव्य आगरे
रत्नां वा मौक्तिकांहि मूल्य मुळि नुरे
रमणीची कूस जिथे नृमणिखनि ठरे
शुद्ध तिचे शीलहि उजळवी गृहा गृहा
प्रिय अमुचा एक महाराष्ट्र देश हा ॥ २ ॥

नग्न खड्ग करिं उघडे बघुनि मावळे
चतुरंग चमूचेहि शौर्य तेहि मावळे
दौडत चहुकडुनि जवे स्वार जेथले
भासत शतगुणित जरी असति एकले
यन्नामा परसुनि रिपु शमितबल अहा
प्रिय अमुचा एक महाराष्ट्र देश हा ॥ ३ ॥

विक्रम - वैराग्य एक जागिं नांदती
जरिपटका भगवा झेंडाहि डोलती
धर्म - राजकारण समवेत चालती
शक्ति युक्ति एकवटुनि कार्य साधिती
पसरे यत्कीर्ति अशी विस्मयावहा
प्रिय अमुचा एक महाराष्ट्र देश हा ॥ ४ ॥

गीत मराठ्यांचे श्रवणिं मुखिं असो
स्फूर्ति, दीप्ति, ध्रृतिहि देत अंतरी ठसो
वचनिं लेखनीहि मराठी गिरा दिसो
सतत महाराष्ट्र - धर्म - मर्म मनिं वसो
देह पडो तत्कारणिं ही असे स्पृहा
प्रिय अमुचा एक महाराष्ट्र देश हा ॥ ५ ॥

- श्रीपाद कृष्ण कोल्हटकर