कुठे शोधिसी रामेश्वर

कुठे शोधिसी रामेश्वर अन् कुठे शोधिसी काशी
हृदयातील भगवंत राहिला हृदयातून उपाशी

झाड फुलांनी आले बहरून
तू न पाहिले डोळे उघडून
वर्षाकाळी पाउसधारा
तुला न दिसला त्यांत इशारा
काय तुला उपयोग आंधळ्या दीप असून उशाशी
हृदयातिल भगवंत राहिला हृदयातून उपाशी

रुद्राक्षांच्या गळ्यात माळा
लाविलेस अन् भस्म कपाळा
कधी न घेउन नांगर हाती
पिकविलेस मातीतुनि मोती
हाय अभाग्या भगवे नेसुन घर संन्यासुन जाशी
हृदयातिल भगवंत राहिला हृदयातून उपाशी

देव बोलतो बाळमुखातुन
देव डोलतो उंच पिकातुन
कधी होउनी देव भिकारी
अन्नासाठी आर्त पुकारी
अवती भवती असुन दिसेना, शोधितोस आकाशी
हृदयातिल भगवंत राहिला हृदयातून उपाशी

- मंगेश पाडगावकर
(तुझे गीत गाण्यासाठी)